Փորձաքննությունների ազգային բյուրոյի տնօրենի գիտության գծով տեղակալ Պատվական Ոսկանյանը հունիսի 4-ից 5-ը հեռավար ձևաչափով մասնակցել է Ռուսաստանի քիմիկոթունաբանական և դատաքիմիական հետազոտությունների մասնագետների ասոցիացիայի կազմակերպած «Փորձագիտական հետազոտության ժամանակակից գործիքային մեթոդները թունաբանության և դատական քիմիայի ոլորտներում» խորագրով գիտագործնական գիտաժողովին: 
ՌԴ Գիտությունների ակադեմիայի Ա.Ն. Ֆրումկինի անվան ֆիզիկական քիմիայի և էլեկտրաքիմիայի ինստիտուտում (Մոսկվա) անցկացված միջոցառումը համախմբել էր դատափորձագիտական բնագավառի առաջատար գիտնականներին ու փորձագետներին տարբեր երկրներից:
Գիտաժողովի բացմանը ողջույնի խոսքով է հանդես եկել Փորձաքննությունների ազգային բյուրոյի տնօրենի գիտության գծով տեղակալ Պատվական Ոսկանյանը: Վերջինս իր ելույթում կարևորել է նմանատիպ միջազգային հարթակների դերը մտքերի փոխանակման, ոլորտում արձանագրված ձեռքբերումների, նոր միտումների քննարկման, ինչպես նաև դատական փորձաքննությունների բնագավառում առկա մարտահրավերների համատեղ հաղթահարման գործում՝ ընդգծելով կառույցների միջև գիտագործնական կապերի շարունակական զարգացման անհրաժեշտությունը:
Գիտաժողովի շրջանակներում ներկայացվել են դատաքիմիական և թունաբանական փորձաքննությունների ոլորտի արդիական խնդիրներն ու նորագույն լուծումները: Ի թիվս արժեքավոր զեկույցների, մասնակիցներն անդրադարձ են կատարել նորագույն՝ քրոմատո-մաս-սպեկտրոմետրիկ սարքավորումներով փորձաքննությունների իրականացման ընթացքում արհեստական բանականության կիրառմանը, ինչը նոր հնարավորություններ է բացում հետազոտությունների արագության և ճշգրտության բարձրացման համար, նոր հոգեակտիվ նյութերի տարածմանը հակազդելու իրավական և մեթոդական հիմքերին, ճանապարհատրանսպորտային պատահարների մասնակից վարորդների մոտ ալկոհոլի և թմրամիջոցների քրոնիկական օգտագործման փաստի ստուգման նոր գործիքային մարկերային մեթոդների մշակմանը և այլ թեմաների:
Փորձաքննությունների ազգային բյուրոն կարևորում է մասնակցությունը նմանօրինակ համաժողովներին՝ ի նպաստ միջազգային համագործակցության շրջանակների ընդլայնման, մեր երկրում դատափորձագիտական հնարավորությունների արդիականացմանն ու ոլորտի կայուն զարգացման ապահովմանը:

05 June 2026